[ad_1]
02:08 م
الجمعة 10 ديسمبر 2021
كتب- هاني صابر:
حل الفنان هاني شاكر، نقيب المهن الموسيقية، ضيفا ببرنامج “حبر سري” المعروض على قناة “القاهرة والناس”، وتحدث خلاله عن تفاصيل عديدة منها ما يتعلق برأيه بكليب “شيماء” وموقف النقابة من “سوستة”، ورده على تصريحات إيمان البحر درويش ومحمد ثروت، وغيرها.
نستعرض لكم أبرز تصريحاته بالحلقة في السطور التالية:
– لو عندي السُلطة، كان زماني مانع مطربين المهرجانات من الغناء في المملكة العربية السعودية، مش مصر بس.
– تبقى كارثة لو تم اعتماد لون المهرجانات الشعبية كلغة سائدة في العالم، ويوم القيامة قرب، مع احترامي للمهرجانات واللي بيحبوها، ولكن مينفعش إن الصورة عن الفن المصري متاخدة من مطربي المهرجانات الشعبية.
– الفنان محمد ثروت ..ظلم نفسه ومركزش في الفن، لأن شغله الخاص اللي وصله وفتح بابه واخده من الفن، وأتمنى يرجع زي ما كان، فهو لم يصبّ تركيزه في الفن لتطوير نفسه.
– سمعت أغنية كليب “شيماء” وضحكت لما شوفتها وزعلت لما الأغنية دي تبقى تريند.
– سوستة.. لو بيغني كويس ومخلص جيش وورقه سليم ولو بيعرف يغني يدخل النقابة ونساعده يدور على أعمال فنية أخرى.
– يوجد كم هائل من الأغاني الخارجة على السوشيال ميديا وشيء يحزن، ولازم نخاف على أولادنا وفيه تنسيق مع جهات رسمية لفلترة الأغاني دي وفيه أمل أن يوتيوب يوقف الأغاني دي وهناك دول بتكلم يوتيوب وبترفض نوعيات معينة واحنا مش أول ناس نطلب دا.
– أغنية “لو بتحب حقيقي صحيح” من أحلى وأجمل الأغاني اللي بحبها عن نفسي، ورأي الفنان إيمان البحر درويش فيها بالنسبة لي تحصيل حاصل، وغنيتها وأنا مقتنع بيها جدًا، ولو قعدت لكل حد على الواحدة مش هنخلص.
– حمو بيكا قبل الإمتحان قدم ورقه وكان بيأخد ورقة تصريح قبل صدور النتيجة النهائية حتى يستطيع أن يؤدي أعماله، ولو عندي سلطة أمنعه من الغناء في السعودية همنعه لأني بحب مصر وبحب أفضل حاجة تطلع بره وأنا غيور على بلدي.
– مشكلة حمو بيكا معانا إنه مش بيعرف يغني والفن مش بالعافية ولو عايز يقدم بعد سنة للنقابة يدخل تاني ويقدم وحمو بيكا بيطلع ناس تانية بتغني معاه وواضح لما دخل اللجنة لوحده معرفش يقنع اللجنة ومش بيعرف يغني نوتة.
– ويجز، اجتاز اختبارات نقابة المهن الموسيقية، وتأهل للحصول على العضوية، وما يقدمه ويجز هو أرقى كثيرا من ما يُقدم بأغاني المهرجانات التي يحمل بعضها الكثير من الإسفاف، والكلمات غير اللائقة.
– مش فاهم حاجة من أغنية “كيفي كدة” لـ ويجز، ولازم يغير كلامه.. أنا مفهمتش حاجة غير”الرضعة والنونة”.
جدير بالذكر أن الفنان هاني شاكر، أحيا حفلا غنائيا في المملكة العربية السعودية مؤخرا على مسرح محمد عبده، وقدم خلالها العديد من الأغاني التي تفاعل معها الجمهور.
[ad_2]
